dansk tekst / grønlandsk tekst

Ikerasak, tininnermi imaaruttartoq Jacob Aue Sobol-imit

Tiniteqilaami piniartut
Angerlakaasut takukulavakka.
Taarsileraangat, umiatsiat angerlakaalersarput, piniartut nipaallutik pisatik uniarlugit nunaqarfimmi ingerlasarput. Ullaat ilaanni suli qaammanngitsoq makippunga, piniartullu talittarfimmut utaqqiartorlugit. Angutit marluk piareersalereersimapput, aperlaajummat umiatsiaq aputaajarpaat. Augo ilisaraara, Tiniteqilaamut tikeqqaarama takusimasara. Uummannaminngaanneersuuvoq, kitaaneerluni, qallunaatorluinnarlu oqalussinnaalluni, Tiniteqilaamili najugaqarpoq, arnaatini tunumioq najorlugu. ”Augo, ilaasinnaavunga?” ”Hansimuna umiatsiaa, aperiniaruk,” Augup akivaanga. Angut Augup eqqaaniittoq massiimivoq, sikiimillunilu. Tassa nunaqarfiup ajoqia. Hansip Augullu kingunerini, piniartut allat angallamminnut aqqarput, benziinat dunkit toorutillu nassarlugit. Kiisami piniarialerpunga.
Qeqertaq Sarpaq palliinnarlugulu, puisimik takuvunga. ”Aaddaaniaa!” Hansip aallaanni isaappaa. Tassa piniartut ileqquat allassimanngitsoq: Puisimik takunneqqaartup, aallaassavaa. Eqqissisimallunga, patruuni immiussara igissutigaara. ”Jaco puisippoq,” Augo suaarpoq. Imarli kisimi aagasaarpoq.”Aammaqqaakinnermii kivioq.” Hansi nassuiaavoq. ”Orsukinnermik kivivoq.” Ullaamiit unnummut muluvugut. Aqqutaani Hansip kalaallisut oqaatsinik ilinniartippaanga.Tsikeq, aaddaa, tsereeq: Siku, aallaat, seqineq. Aallaqqaammut ingerlaannaq puigorpakka, Hansilli uteriinnerinnaani sivitsunngitsoq oqaasialuit ilikkapallappakka. Ulloq taanna puiseqaqaaq. Hansi pingasoraarpoq, Augo tallimat. Umiatsiaq ulikkaarmat, angerlamut aallarpugut. Ungasissumi Tiniteqilaap qullii, qaqqap sinaani illutik uisorilapput. “Takuuk, Københavni,” Hans oqarpoq.
Apuukkatta Hansi neriartoqqusivoq. Ilaqutariit tamarmik igaffimmi issaasimapput, puugutaq niutsiviusoq unngussimallugu, qaarsillarluta nerivugut, puisi nutaaq orsulik, ullormut ilinniagassat eqqaallattaajutigalugit: ”Puilimi pilararpua!” Puisimik pisaqarpunga! ”Nuliakkaaq mamakkaaju! Arnaq mamarpoq!”

James-ip illua
Ungasianiit aggersunga takusinnaavaanga. Utaqqisimavaanga.
James-ip illuanut ingerlatillunga qattuninnguakkoorpunga. Igalaakkut itsuartoqarpoq. Qanilliartortillunga aamma alla itsuarpoq. Suli ataaseq: pingasut, sisamat, tallimat, arfinillit, arfineq marluk, arfineq pingasut, qulingiluat. Jamesi meeralerujussuuvoq. Igalaaq ammarlugu aalateriffigaanga:“Pulaarniaad! Pulaarniartigut!“
Illup silataani innaallagissiuut pisoqaq, tupermik ulinneqarsimavoq. Taassumap illu innaallagialersugaraa, taamaalilluta unnukkut fjernsynersinnaasarpugut imaluunniit nallukattaalluta. Ilaanneeriarlunili innaallagisiuut qamittarpoq, tarruttarluta, Jamesilu oqalualuutigaluni qaammartartulerluni aniartortarpoq. Tarrup ataani meeqqat toqqortaqattaarput, nilliaannarlu arpaqattaarlutik. Tassanngaannaq nipaarupput. Piniartutoqqat ilaat qanga pisimasunik oqaluttualerpoq. Nipaannerup, illup ilua qulangertutut ippaa, meeqqallu uitsaarissipput. Naneruut uppitinneqarpoq, nukarliit ilaat qiavoq, innaallagissiuut aallartinneqarpoq, qaamanerlu takkuteqqilluni.
Kulaaaa Jaco.“ James ilassiorpoq. Tunuatungaani torsuusaq kavaajanik kamippannillu assigiinngitsunik angissusilinnik ilioraaffigineqarsimavoq, anartarfimmi atisat ipput: atisat qaleriiaarsimasut. Teqeqqumi aallaat napavoq. Igaffimmi paniat Louise nulialu Martha puisimik pilallutik aallartissimapput, qilaami ameq panersigaq nivingavoq, qattami aapalaartumi ameq alla qitulissammat kininneqarsimavoq. “Puisit amerlaqaat, aat!” James oqarpoq.
Inimi issaavugut, tassani nerriiveeraqarpoq niulukitsumik, issiavissuit madras-ilu natermi ipput. Nunaqarfiup utoqqaanerusortai isaapput, nalukattaatissagatta. “Kaappid? Kaappit? James suaaarpoq. Naqqup qeqqani puisip kiataata illua pujualaartuinnaq avipparput. Jamesip illuaniit kaalluni anisoqarneq ajorpoq. Daaj marlunnik ukiulik saarlisaarluni takkuppoq, tamusseqataarusulluni. Taasarpara Kammaaji – kammaga. Anini Ferdinand sisamanik ukiulik peqatigalugu tamataqarani natermi arpaqattaarpoq. Qimussertuusaarput: Daaj allunaasamik qilerutsersimavoq, Ferdinand-ilu uniarlugu, taanna issiaviup tunuani qeqarpoq iperaatsilu silaannakkoortittarlugu, soorlu ataatani angajuniluunniit piniariarsimatillutik tikikkiartortarnerisut. Inimi madressimiipput angajua Gedion, arnaatinilu kunissorlugu. Sanianni innangavoq aleqaa, taassumap Louis nunaqarfimmi tullermi Kuummiuninngaanneersoq peqatigalugu. Niviarsiaqqat nukarliit sisamat natermi ulamertunngorlutik qitipput. Sukkatsikkiartuaarlutik kaavipput. Arlaat illarpoq, arlaat nilliummivoq pingajuallu erinarsorluni. James suaarpoq: “Adda! Taa!” Tusaasaqarsimavoq. Qimmit qilupput. Sila taarpoq. James-i qaqqap killinganut qinerpoq. “Kisiina? Sunaana?” Sivisuumik uninngaqqissaarpugut, takusassaqanngilarli. Uunnaavik siggartalerpoq, kaffiliortoqarporlu qalaqqaamik.
Isaalerput; aalisartoq Mathias, Ane utoqqaq kiisalu qilaatersortartoq Robert. Nallukattarluta Olsen-issamaalerpugut. Illunnguaq isersimaffik uumassuseqarpasippoq. Maani angerlarsimasutut misigisimavunga. Meeqqat innarfissaat nallermat, James-ip issiavissuit akisaasartai natermut siaruartitaarpai. Illu nipaarutiimivoq, uangalu ullumiummat Jamesilu aalisarnerput eqqarsaatigaara:
Ullaaralaaq querasaarpaluk tusaavara, igalaama atinnguani. Takkigani Jamesi qeqarpoq sikumut toorunni nassarlugu. Qaammatigeqisumi aperlaamilu ingerlavugut. Siku toorlugu putuarput. Sivitsunngitsoq aalisagarujussuaq pisaraara. Jamesip iluatsitsinera oqalualuutigaa. Aamma tassa aalisaatiga nusualaarneqartutut ippoq. “Eeqqimi! Aarimmi kiivoq!” James suaarpoq. Aalisagaq alla aamma tassa kiivoq. Putuliaq mikivallaarmat, imaq kaallugu pisara qaqippara. „Pulua addiniaa! Putuami alleriaruk!” James oqarpoq, “aalisangaq angeraaq. Aalisagaq angeqaaq.“

Sabine
Asannilersoorpunga. Sabine 19-inik ukioqarpoq, uangalu 23-it. Aalajangerpunga Tiniteqilaamiiginnarniarlunga. Piniartutut ilinniarusuppunga. Puisinik aallaaniartarlunga, aalisakkanillu pisaqartarlunga. Tunumiut oqaasii ilinniarlugit. Assiliisarnera unitsippara.

Asannilersoorneq
Sabine uannut takoqqusaanngilaq. Nassuiaakkaluarpara, nuannarineqanngitsoq peqatigiittarnerput. Kingorna sikukkoorlunga qeqertamut Sarpamukarpunga. Hansip aperaanga qanoq innikkut uterusunnersunga. Sabine asannilersoorfigeqqavara, tamannalu pillugu oqaloqatigisinnaanngilara. Unnukkut pulaaqqusinera itigartikkakku aliatsappoq. Unuakkut siallerpoq, tamanna martsimi nalinginnaanngikkaluarpoq. Hansikkut qalianni madressimi innangavunga, apummi tumaarpaluk tusalerakku, igalaama ataani. Ikitaqarnanga itsuarpunga. Tasama Sabine qummut isigivoq. Takunerpaanga? Innaqqippunga, qipillunga utaqqilerlungalu. Nalunaaquttap akunnerata affaa ingerlavoq. Immaqa qimaguttoq tusaanngitsoorsimavara. Itsuaqqippunga. Masattuinnaalluni Sabine qeqarpoq, igalaallu tungaanut isigaluni. Qulleq ikippara aalateriffigalugulu. Unnuk taanna sialuup ataani sivisuumik saqisaarpugut.

Tumit tammartut
Tatsit taakkua pingasut qaangereersimalerlugillu tumit tammaavakka.
Eqqarsaatikka allamut sammitilersimavakka, massiimigamalu ilisarisaqarsinnaanngilanga. Uterpunga, paarlannerilli arfineq pingasut qulingilualluunniit assigiinngitsunut toraartut tikipakka. Taakkua tamarmik tikinngisaannarsimasannut ingerlaveqarput, imaluunniit maangaannaq kipisarput.
Akunnerit ingerlapput, taarlu takkuppoq. Qasuneq manngiaasutut ililluni takkuppoq, ullut marluk piffimmi assorornartumi ingerlareersimavunga. Hansip oqaasii
eqqaavakka: ” Aqqut Tiniteqilaamiit kangerlukkoorpoq, sermikkut, qaqqatigut, tatsit pingasut aqqusaarlugit, naggataatigut Tasiilap kangerlua tikittariaalluni.” Tiniteqilaaq qimattariaqarlugu misigisimavunga. Mattusimaneqarneq misigisara, qimanniarlugu aalajangersimavunga, Tasiilamut pisunniarlunga – Tunumi illoqarfiit annersaat 1691-inik inuttussusilik. Tasiilamulli apuukkama angerlarserneq erngerluni misinnarsivoq. Illoqarfik angivallaarpoq. Ilisarisimasaqanngilanga, Ilaqutariillu qanilaassusaat Tiniteqilaami ittoq maqaasilerpara.
Angerlamununa aqqutaa atuartillugu sammiveeruttunga. Aalajangerpunga ujarassuup saavani qasuerserlunga uninnganiarlunga, qaammarnissaalu tassani utaqqillugu. Salavunga. Apriili qaammataammat ullukkut kiattarpoq, aqqutaanilu unnuinissara naatsersuutigisimanngilara. Kiagussimanermik atisakka masapput, qiialerpungalu. Qaqqat nuui persilersut malugaakka, sermersuullu qulaani nuissat aalajangersimasumik ilusinittut takusinnaavakka, tunup anoraa annilaangagineqaqisoq, piteraq takkutilerunarpoq. Piteralissagaluarpat illernit tamarmik tammartussaapput, issangisseriarluni sakkortuumik anorersualissaaq, silaannaq allanngoriataarluni, persertorujussuanngussallunilu. Isikkivik tammassaaq. Oqaluttuarineqartartut eqqarsaatigilerpakka, inuit piteraliussaasut asimiitsillutik iliuuserisartagaat: Itersaliortariaqarpoq, piterarlu qaangiussiillugu. Oqaluttuaqarportaaq piteraliussaallutik toqusimasunik, piniariartarfimminnut apuunnissaminnut qallillutillu ajunaarsimasunik. Piterassamaaleraangat qatsungasorsuusarpoq. Nalunartarluni piterassamaarnersoq. Ujaqqap eqqaani aanngaaleraluarsimavunga, qiianarsimmalli aalajangerpunga unnuaq tamaat ujarak kaavilukaarlugu pisunniarlunga. Akuttunngitsunik qimusserpalummik tusaasorilersaraluarpunga. Qanoq ileriaraangama qaqqat nalaanni aalanasorisannik isiginiagaqartarpunga, ungasissumiillu innaniit ujaqqat nakkaarpalunneri tusarsaasarpakka. Kingumut piniartutoqqat oqaluasaarisartagaat eqqarsaatigeqqilerpakka. Inuit inuillernikut uteqqinngisaannarlutillu. Tamakkua taasarpaat qivittut.
Qaammariartorpoq, illernit arlaat aqqutigalugit aallarpunga. Nalunaaquttap akunnialui qaangiummata sikup sinaavanut pivunga, avatiga tamarmi imaavoq. Tassani umiatsiat sikumut qerrugussimasut ipput. Aasarli manna piniartunik inoqarami kingorna orninneqaqqissimagunanngilaq. Sinilaarnissara neriuutigalugu, innakarfigaara toqqup uligisimasaa annoraamineq pisoqaq, qimaannarneqarsimasoq. Seqernulli kissarnera suli sakkukippallaarpoq, nillerpallaarluni, sinissinnaanngilangalu. Qaqqamut qaninnermut majuaannarpunga, nunamik ilisariasinnaasaannik takunissara neriuutigalugu. Paasivara Sermiliup kangerluaniillunga, Ammassaliup qeqertaata kitaatungaani. Qeqertap avannaatigoorlunga ingerlaguma, Sarpaq tikissinnaassavara, Tiniteqilaamullu ingerlaqqillunga. Tamaangali illinernik ingerlasoqanngilaq. Aput miiteritut portutigivoq, qaqqallu saneraatigoorlunga, kangerlummut ingerlasinnaanera nalornivara. Umiatsiat ilaanniit quaminermik pisoqqamik tigusivunga, aalajangerlungalu aggerfinnut uteqqiinnarniarlunga.Unnuami aput pisuffikkuminartarpoq manngerami, maannali seqernup qinnguaasa aput aatsilersimavaat, alloriarnikkalu tamaasa maasarpunga, qitera tikivittarlugu. Imerusuppunga, imissaqarnangali. Apummik oqummersisarpunga, naak nalunngikkaluarlugu taamaaliornerma nukillaangalersiinnarsinnaagaanga. Taamatut ingerlavunga, nalunaaquttap akunnerpassuini.
Apummi taarnersat takoriasaarpakka. Aak. Aak nutaaq. Aak qaqqap killingatigut qummut kuserusaarsimasoq takussaavoq, qimussimik aqqutigineqarsimalluni. Taannaasimassava qimusseq unnuaq tusaasara? Aak atuarlugu ingerlalerpunga – taamaalioruma piniartup angunissaa qularnarunaassaaq. Naak illernit allat qimalugit, aqqummut ajornakusoortumut sangusimagaluartut, qimattaaliorlugit qaqqakkut ingerlasimaneri atualerpakka.
Kiisami ungasissumi sermip uukkartarfia takusinnaalerpara. Sermeq Tiniteqilaap kangerluanut atasoq. Aap kuserneri tamaanga killiput, taamatullu qamutit illerngi. Kingumut qiviarpunga, illerngit taakkua atuakkakka kisimik takussaapput.
Akunnerit ingerlapput, taarlu takkuteqqiluni. Qaammat imissisimasoq qaamaqqutaavoq, nuissanilli ingerlaartunik asserneqartarluni.. Paarnguusaannarlunga, sermip qaava qalligakku, qasuerserniarlunga ingippunga. Anerterinera ersaripoq. Anerteriunnaamigama, nipi alla tusaalerpara. Qimmit anertererpalunneri. Uisorersarpunga, taaka ungasigani piniartoq qamutaalu erserput. Isigaanga, paasillugulu takusimaginni. “Tsumud? Sumunnalerpit?” “Diilerilaamud. Tiniteqilaamut,” akivara.
Ulaqqingiililerpaalid . Utaqqeriilippaatsit.”
Aqaguani iterpunga ininniillunga, kiinara uuararnernik ulikkaarpoq. Hansip ullaakkorsiutissannik piareersaassimavaanga. Nipeqarani igaffimmi issiavoq, nerisungalu nakullunga. Naammassigama oqarfigaanga: “Jaco nerivoq, Jaco uumavoq.”

Upernaaq
Upernalerpoq. Siku aseruatitilersimavoq, arnat meeqqallu kanajorniartarput. Qarsorseriikkanik aalisaatilisarluta puttaaniit puttaanut pisseqattaartarpugut, sissap ukiullu sikuata akunneraniittunut. Qeqqussat qorsuit katersortarpagut, kangerluup naqqani naasartut. Sarpap qanitaani tamakkoqaqaaq. Tinissimatillugu ikkarlunni katersineq ajornannginnerusarpoq, qeqqussanik killuutitut atornerusarparput, qisumineq nuuatigut savittaligaq. Asimi qeqquartorluni mamartaqaat, ingammik nutaajutillugit uillunik siuteqqunillu akullattaarlugit. Nunaqarfitsinni orserartuutigalugit, miseqqamulluunniit misullattaarlugit mamartaqaat.

Tasiitsi
Uanga, ikinngutigalu Otto. Nylon-i 20 miiteri qarsorsarlu. Qarsorsap nalaa ammalortuliortutut sukkatsikkiartuaartumik kaaviteriarlugu, miloriutiitigalugu iperartarparput. Nusullattaarlugu nunamut amuulersarparput. Imaq qaputtuinnanngortarpoq, nylon-i najummisarput sukattarpoq, eqalorujussuarlu pinaasertoq kisimi isigequlersarpoq.
Mulaadda-nik katersisarpugut. Paarnaqutit, taakkua qisugalugit kaffiliorpugut, eqaluillu marluk uullutigit. Eqaluit kuisartugaralugit nerivagut. Nerereeratta sinngup poorisatsinnut ikivugut. Erininarsinngitsoq qaammarmat, arlalinnik eqaluppugut.
”Ullumi Junip 21-iat. Kalaallit nunaata ullorsiorfia. Angerlartariaqarpugut.“ Otto suaariasaarpoq. „Nunaqarfitsinni nalliuttorsiorput.“ Angerlamut aallarpugut, qaqqat itivittarlugit, nammattakkagut eqalunnik angisuunik immersimasagut nammallutigit. Tiniteqilaaq qallillutigu, takuagut kikkut tamarmik katersortarfiup silataanut katersuussimasut. Arnap utoqqasaap parsiarpaatigut, pisagullu nakkullugit. „Tasiitsiminngaanniid damaavarpisi? Tasiitsiminngaanneerpisi?“ „Inuusudduungaddarngarma daamaaseertarpua. Uangattaaq inuusukkallarama taamaasiortarpunga.”
Tunuatungitsinni mannimmik tigummilluni arpaliuulluni unammineq aallartereersimavoq.


Taseq sikuerlaaq
Sabinalu tuperiarsimavugut. Ullaakkut tusaavagut umiatsiaaqqat puttaatigut appakaanniarsarerpaluttut, Sermilimmi. Qaqqap qaavaniit takusinnaavagut, umiatsiaaqqat puttaat akulloqquallugit sangusaarlutik ingerlasut, sikup qupisarneri tusarsaapput, motoori aallarumajunnaaqqarpaluppoq, angutit umiatsiaminniit nioriarlutik kaamisaapput, puttaanut kiggigussimaneri kaanngartinniarlugit. Ikaasaalaaminngaaneerput eqalunniarsimallutik.
Tiniteqilaamut angerlartilluta, aqqutaani tatsit sanioqquttarpagut. Sabinap tamaasa nalunngilai, nalunnguartariaqarpugullu. Tamataqarnata nalunnguarpugut.

Qilaatersortartoq Robert
Aiiiiiaiaaaaa aiiiaaiiaaa...“ Seeqquni peqissimatillugit timini illuanit illuanut uaatippaa, qisuminermik qilaatip sinarsua anaallattaajutigalugu. Qilaat, nannup aqajaruanik „ikialerneqarsimasoq“, inuit ileqqutoqaanni aaqqiagiinnginnernut iluarsiniutitut atorneqartarpoq. Taallat qitillu iluaqutsiullugit aaqqiaginngisaq illaruaatissiarineqartarpoq.
Qilaatersullammak tunumioq tusaamasaq, Robert Umerineq, suli Tiniteqilaap atuartuinik ilinniartitsisarpoq. Silarsuup ilarujussuani angalaartarsimavoq qilaatersoriartorluni, maannali Tiniteqilaamiiginnartariaqalersimavoq, gigt-eqarnini peqqutigalugu. Roberti ataqqineqaqaaq, kisimiillunilu ernuttani pingasut perorsagarai.
Aasarisseruttoraa Robert ernuttanilu Tiniteqilaap avannaatungaani piniariartut nalaappakka. Qaqqap ataani kangerlummut isikkivigissumut tupersimapput. Eqaluit nutaggariit panertuliaralugit, allunaasamut nivinngaassorsimavaat. Puisip neqaanik iggasileruttorsimaput. James-ilu marluulluta ,Sermiliup kangerluata qinnguanut umiatsiamik ingerlatilluta, Robert qaqqap ataani toorninnguatut isikkoqalerpoq. Ujarannguup tunuanut pallorsimavoq, pusimillu puisoqarnissaanut umerluni. Qanitaani illutuaq ippoq, qaqqanik nuui apereersimasunik, kangerluullu iluliarsuinik unguneqarsimalluni. Tamanna qanga piniariartarfitoqaasimavoq Paarnakajiid. Tamaani Robert inunngorsimavoq.

Iffiukkat immuillu panertut
Pisiniarfimmeereerlunga iserpunga, iffiukkanik immunillu panertunik nassarlunga.
Sumiikkavit? Kina oqaloqatigaajuk? Sabine itersimavoq.

Qalunaat nunaat-Kalaallit nunaat, uterlugulu
Sabinalu Qallunaat nunaaliarpugut.
Sabinalu Kalaallit nunaaliarpugut.

Angerlarsimaqqilerpugut
Taarpoq, -20 gradenik issippoq. Oqarasuaatit aqqutaat aserorsimapput. Tasiilap Taxatuaat ingerlanngillat. Nassatagut 90 kiilut missiliorpaat, qulimiguullip mittarfia qummukajaakkooqqaartariaavoq, qaqqikkaannilu ammukartariaalluni.Ullaajuvoq, biilinut kullorsorlunga aallartippunga. Angutit utoqqaat marluk, atuarfiup anartarfiata kuuffiata aqqutaanik ujarlersut uniffigaatigut. Jylland-ip avannaaneersuupput, kiagussunneqaallu. Qulimiguulik manngertornisoq ilaaffigaarput, inunnik tallimanik ilaasoqarsinnaasoq: Aquttup saniatigut, Sabine uanga,Tiniteqilaarmiorlu angut utoqqasaaq, kræfteqarluni Qallunaat nunaanni suliaritissimasoq ilaaqatigaarput. Siullermik Isertumut ingerlaqqaassaagut, Ammassallup pigisaanut, tassani ilaasut tallimassaat ikissallugu. Isertoq pallilerlutigulu piteraq nalaapparput. Anoraasuap nunaqarfik qulaavaagajuppaa, sermimut ataannarnera patsisaalluni. Aquttup attataasat toortalerpai, radiokkullu attaveqarluni. Qulleq aappalaartoq ikeqattaarpoq. Aquutit sillimmatit qiviarpakka, taakua saninnguanni ipput. Qulimiguulik illuanut saappoq. Isertoq tikinngitsoorparput.
Seqineq aappillerussimalluni kangerlummut nungusoq takullatsiarparput.Aatsaat januaarip qaammataa qiteqquppat – qaammat ataaseq qaangiuppat Tiniteqilaap qaqqaasa qulaanni ittoq takusaleqqissallutigu.
Tamaani timmitilluta, kangerluit, qaqqat sermillu qulaavaatillugit, illullu qalliartorusaakkagut toorninnguatut illutik, qaqqap ataani inissisimasut qalliartortillugit, eqqumiigigaluttuinnarpara inuit taamak avinngarusimatigalutik inuusinnaanerat. Nunaqarfimmulli tikissimalereeratta paasisungavara, Tiniteqilaarmiut silarsuup qeqqaniittutullusooq inissisimasut, silarsuarmili pisartut nunaqarfinnguami annikitsoralaannguamik misinnartarlutik.
Tassalu tamaani inuuneq toqqorsimasutut ippoq.

Anartarfiup qattartaa
Sapaammi ualikkut, anartarfiup qattartaa qannilluni ulikkaarsimasarpoq. Sanianiippoq qattaq sillimmat – pukkinnerumaartoq – atorneqalereersimasorli. Aquisimatilluni uninngaqqissaartariaqartarpoq, userangajalluni nullut masatsinnginniassammagit. Ataasinngornermi ullaakkut, anartarfilerisoq matukkut kasuttortarpoq, anartarfillu userarnaveersaavillugu, apisimatillugu quaannaveersaarluni firehjul-it kalitaannut, annartarfiit kuioraaviannut kuiartortarlugu.
Ullaaq taanna Asser anartarfilerisuuvoq. ”Kumorn Jaaco, uddup qeqqani tamaava neerngaarditsavid ? Godmorgen Jaco, ullup qeqqanut neriartussavit?” Asser-ip anitarisimasagut imaariartoriikatappai. Sapaatip akunnerata naanerani anartarfiit ulikkaartitersimasat, illunut arlalinnut imaariartugassaapput.

Ane utoqqaq
Neqip qalarlaap tikka naavara, Anetoqqap illuanut appakaakkama. Ernuttani Asser Talitha-lu najugaqatigivai. Nalunaaqutaq ullup qiterarpoq – taamaaligaangat, qitornai tamarmik illuanut katersuuttarput ullup qeqqasioriarlutik. Anep niusivaanga, tajarneq suaasalerlugu.”Naddinnaraalid. Naakkinaqaatit,” oqarfigaanga, ”damaani alaalararnaddi anaanaranngitsilid. Niiniaad. Maani ataataqarnallu anaanaqanngilatit. Neriniarit.” Ane 83-inik ukioqarpoq, sulilu sullerilluni.Ernini piniariarsimallutik tikikkaangata, puisitaasa amii suliariuaannarpai. Unnukkut James-ikkunni nallukattaakkaangatta, assai eqingasulittut, nallukattanik tunioraasut isigiuartarpakka. Ammit tusind-ilippassuit qapiartarsimavai, innerlugit, assannillu taakkunannga mersorlugit.
Anep angerlarsimaffiani iikkani assit amerlasuut nivingapput, sivisuumik inuusimaneranit, ilaqutartuneranillu takussutisiillutik. Tamakkua ilaat toqoreersimapput, Anellu oqaluttuassaqartittuaannarpai, kikkuunerinik aperigaanganni. Anep oqalunnera paasiuaannartanngilara, isaasali allanngorarnerini oqaatiginiagaa paasisarpara. ”Tsuaasardoqqitsavid – skaavimmi aamma qarorduliararpoq. Suaasartoqissavit – skaavimmi aamma qaqortuliaqarpoq,” oqarpoq.
Jaaco daa aaddarniarda. Jaaco, qaa aallarniarta,” Asser oqarpoq, ”Kiliiddani kalertsiviardilerpuud. Uillunik katersiartulerpugut.”

Tiniteqilaami arnaatigisaq
uilortaanneqartarpoq
Ikaasaardivap kangerlua amilimasuuvoq isorartulluni, tassani Asser-ilu tinilluarsiivugut, taamaalioreeratta sissap killingani uilortarpugut. Tamatta puussiaq angisooq ulikkaarparput.
Tiniteqilaami arnaatigisaq uilortaanneqartarpoq.

Kukinnut qalipaat
Takanna arnat uimit piniariarsimallutik tikinnissaannut utaqqipput. Sabinap Danmarkimi kukinnut qalipaatisiarisimasaa misiligarpaat. Kinguninngua nallukattaapput, qanoq iliallakkaangamik arlaat kangerluup tungaanut qinertarpoq, isumaaluppasillunilu oqartarluni: ”Naamminaad? Sumiileqaat?”
Taarsiartulerpoq, qanittumi tikinnissaat ilimanarsivoq.

Vittus-ip akerrortunera
Vittus puisinniaqatigaara. Sabinap illooraa, Hansip qatanngutaa.
Suli taartoq nalunaaqutaq arfineq pingasunut aallarpugut. Akunnerni marlunni, imartunersannguaq ornipparput, arriitsumik qaammariartorpoq, taamallu kigaatsigisumik peerukkiartoqqilluni, soorlu aasakkut taarsisarnera assigalugu.
Sermiliup- kangerlua nilleqaaq. Akuttunngitsumik puttaanut niusarpugut kissassarnniarluta, imarnersanilu puiseqarnersiorlugu qinertarluta. Ullumikkulli puiseqanngilaq. Silaannaq –25 imik issippoq.
Vittup isigimmersoriarlunga oqatuarluni oqarfigaanga: Kalaaddid nunaanni uumatsangaanni tsanngilaajararpoq. Kalaallit nunaanni uumassagaanni sanngisuusariaqarpoq.”

45 m/sek.
Igalaat ilorliit ilusimapput, Sabinalu igalaani naneruusersorpugut, ilunerit aatsinniarlugit, kissasserniarlutalu. Angaata qalianut nutsersimavugut, sermip tungaanut avannaq-kujasimmut sammisumut, piteqqap takkuttarfiata tungaanut. Madressit saattut marluk siniffigisarpagut. Madressit killingini atisat piareerlugit qaleriit sisamanngorlugit imusimapput, iikkami aallaat iigartisimavoq puisimut pisassamut piareersimalluni. Immaqa aqagu. Ini allanik pisataqanngilaq, nerriveerannguaq issiavimmut assingunerusoq eqqaassanngikkaanni. Qaliata igalaavi saapput, anorleraangat, nipi quppaasigut nipiliortaqaaq. Sabinap igalaat quppai alersinik trussinillu milissorlugit aallartissimavai. Perorluartiterpai, silaannarissarfik pappialamik qeratasuumik asseriarlugu sinaa nipititerluarpaa. ”Pilarngar-lerpoq. Piteralerpoq,” oqarpoq. Silassamik paasiniaasarfimmut sianerpunga, paasillugulu anori 45 m/sek-imik sukkassuseqassasoq. Igalaat assertiterpagut utaqqilerlutalu.

Qimmeq toqungasoq kukkukuuararlu
Unnummut angerlamut ingerlatillunga aqqutaani qimmeq toqungasoq naaffigaara. Taassumap piteraq anigorsinnaasimanngilaa. Sabine bingoriarsimalluni angerlaqqammivoq. Pingasoriarluni eqquisimavoq, kaasarfii ilernikunik ulikkaarput.
Kukkukuuarartortussanngorpugut.


Assaaniarit! Putuliorniarit!
„Inngangaa misiiniaa! Atsaaniaa! Pululoorniaad! Innga misilinniaruk! Assaaniarit! Putuliorniarit!” Jamesip puisinut qassutai nassaarineq ajulerpagut.
Piterarnerata aqqutit tamaasa kaanngartissimavai, taamaakkaluartoq nivallutalu siku putoortuarparput. Putoq naammalermat Jamesip puillaammut tarrarsuuteeraq qilersorpaa, sikullu ataanut tarrarsutigilerlugu. Qassutit takussaanngillat, taamaattumik allanik putuliorpugut.
Tassanngaannaq Jamesi tarrarsuutikkut takusaqalerpoq. Qassutit nylon-ertaminerigunagaannik.”Inngangaa misiniaa! Atsaaniaa! Puloorniaad! Innga misilinniaruk! Assaaniarit! Putuliorniarit!” Aamma naamik, tamaaniinngillat. Assaajuarpugut, putuliortuarlutalu. Kiisamiuna qisumininnguaq nassaarileripput, qassutinut qilersuussaq. Jamesip allunaasaq nutsulerpaa suaarlungalu:”Puileq. Puisi!” Tuaviinnaq assaavugut putuliorlutalu, erininarsinngitsoq puisi angisooq qaqipparput, Natseq puallaruttorneq. Kinguninngua Tiniteqilaamut aallarpugut. Ulloq naallugu nittaassimammat, aputip siku aatsilersimavaa, taamaattumik mianersortariaqarpugut. Jamesip tumai atuarlugit!
Tiniteqilaami ilaqutariit nutaartorput. Kingorna iffiartuuppugut remouladelerlugit.

Puisinut qassutit
Puisinut qassutit sikup ataanut nivinngarneqartarput, nunamiit imaluunniit ilulissat killingini, tamaani puisit ingerlaartarmata. Piniartoq sikumi alluanik pingasunik putusisarpoq, alluamiit siullermiit alluap pingajuannut qassutit takissusaat missiliortarpaat. Qassutit sikup ataatigut siaarneqartarput, puillaat alluamiit alluamut puillartuutigalugu. Taamaalioreeraanni qisuminernut isui qilersuunneqartarput, qassutit siaangatinniarlugit. Putup qiterliup eqqaani aamma qisuminermut allunaasaq qilersuunneqartarpoq. Qassusiaraanni, taanna nusukarlugu, pisaqarsimaneri paasineqartarput. Nunamut qassusersimagaanni, tamaaniittut pisaqarajunnerusarput, puisit sissap qanitaa qeqqussanik neriniaaluffigisarmassuk. Qassutit miiterialunnguanik ititigisumi inissisimasarput. Ataasiarlunga qassusersimavunga kukkusumut. Qassuserfigisinnaasat tamarmik piukkunnartuaannartanngillat, sikut ingerlaarneri allanngorartarmata, tinittarnera ulittarneralu apeqqutaatillugit. Taamani uissuummivunga, qassutima affai nunamiittut takulerakkit! Maanna pingasunik qassuteqarpunga, marluk pisaqakulapput. Pingajui arlaleriarlutik annaasarsimapput, putuat angimmat aataamik annaasimassangatittarpakka. Aataaq taannaajuartarsimagunarpoq, puisimmi ingerlaarfii aalajangersimasuusarmata.

Angut, nannutut isikkulik
Inuit illunnguaminniit aniapput. James Boas-ilu Sarpap nalaaniit aalateripput. Nannumik takusimapput. Sisoraatikka amermik perlaalersimasakka ateriarlugit, sikukkut kaassalillunga aallarpunga, piniartut allat pisuinnaq aallakaapput, ilaat qimussimik. Nanuusorisarput toorninnguatut ittoq nanuunngilaq. Kaaleerngaruna.

1,2,3, kiivoq! 1, 2, kiivoq! 1, kiivoq! Kiivoq! Kiivoq! Kiivoq!
Uuararaaq! Uugaqaqaaq!” Pisiniarfiup aqqutaani Boas nalaappara, pooq ulikkaartoq uniaraa. “Tsivagatsilad! Ila tupinnaraluttuaq!” nilliummerpunga. Umiatsiaat eqqaanni pisarisimavai – Suli peqarnerarpaa. Aalisaatika aavakka. Umiatsiaat killingini putut aalisarfigisimasat sisamat ipput. Putup eqqaa aalisarfiginnisoq toqqarpara, tamaani pisaqartoqaqqammisimagami erlaviiaaffiusimavoq aagasaarlunilu.
Allunaasaq nusullattaallugu kisitsilerpunga:”1,2,3, kiivoq! 1,2,3, kiivoq, 1,2, kiivoq! 1, kiivoq! 1, kiivoq! 1, kiivoq! Kiivoq! Kiivoq! Kiivoq!
Uugaq anginngitsuuvoq, 10-25 cm, nalaatsilluarsimagaanni marluk - pingasukkaarlutik kiisarput. Seeqqummerpunga putumiillu immamut itsuarlunga, putoq 30 cm-
Eritut annertutigaaq. Sikup ataa isigisara uukkanik taartuinnaavoq, uukkat tuusind-ilikkaat tasamaniikkunarput. Aalisaatiga ningippara, takusinnaavakkalu uukkat ataatsimoortut kiiartortut. Kigaatsunnguamik aalisaatiga amoorpara, isigisinnaalerpakka uukkat putuliap ataaniittut; qallimmata taamaallaalliuna assannik qaloorakkit. Aalisarnera tiguartiffigisimallugu James qulinni benziinaqarfiit eqqaanni nikorfasoq takusimanngilara. Nipituumik illariarpoq suaarlunilu: “Tsivaakaatsiiii.”

Piniartumik ilisineq
Tiniteqilaami, kommunep allaffiata akiani, illunnguaq aapalaartoq ippoq. Igalaavi matoorneqarsimaput, matualu kikiattuiffigineqarsimalluni. Ulluni tulleriinni aperujusuarsimavoq, illulu taanna matoriaannanngorsimallugu. Ullualuit matuma sironatigut illu taanna ikumasoq sanioqquppara, qalleriarakku igalaavarannguanut qiviarama, takuara angut utoqqaq, timimigut atisaqarnani siniffimmini issiasoq, silaannarmullu ukisilluni. Jamesikkunni puisitoreerlunga, nallukattaqataareerlungalu illu taanna angerlamut sanioqquteqqippara, angut taanna suli inimini nikissimanani issiasoq, silaannarmullu isigaluni. Tassa Taqqisimat.
Qulimiguullip illerfia tikiuppaa. Taqqisimat illunnguamini aappalaartumi toqunngilaq, Tasiilalli napparsimaviani ullussani kingulliit atorpai, tungiini qaallorissuni ullussani kingulliit innangavigai. Mittarfeeqqami illerfia Hansimit ilaqutaasunillu aaneqarpoq. Ajoqip qamutini angisuuni qaqortuni, illerfia kaassuarpaa, eqqaanni ilaqutaasut sanningasoq angisooq qaqortoq ersuppaat.
Oqaluffimmi illerfiup qaava naasunik plastikkinik ilioraaffigineqarpoq, aappalaartunik, sungaartunik, tunguusanik, qorsunnik, tungujortunillu. Taqqisimat nunaqarfikkut ingerlanneqarpoq. Sanningasumik ersuttoq siulliuvoq, nunaqqataasullu malinniput. Utaqqisarfimmukaanneqarpoq, iliveqarfiup eqqannguaniittumut. Ingerlaartut tassunga unipput.
Nunap qererujussuartarnera pissutigalugu, toqusut nunamut ilineqarsinnaasanngillat, taamaattuminguna utaqqisarfiliorsimasut, tassunga toqusoq illerfimmiitillugu inissikkallarneqartarpoq, sermip nunallu aannissaata tungaanut. Utaqqisarfik anginngilaq aappalaartumillu qalipanneqarsimalluni, pingasunik initaqarpoq, illerfinnut pingasunut naammagussakkanik. Maanna inissat marluk ilisiffigineqarsimapput.
Angutit sisamat illerfik utaqqisarfimmut ningippaat, sanianni ilaqutaasut ikinngutaasullu Taqqisimat naggammik tussiarfigaat. Eqqarsaatigaara , qaqutiguugaluartumik Taqisimat illumi silataanittoq takusarsimagakku, issialuni qamutini iluarsaakkai.
Sapaatit akunneri marluk matuma siorna Sabine assiliivimmik tunisimavara, maannalu Taqqisimaap inuulluaquneqarnera assilivaa. Ilatsinniit avissaarluta, qaqqajunnap killinganut qummukajaakkut majuarpugut. Aatsaavissuaq nunaqarfimmiut taamatut katerisimasut takuakka, kangerluk apummit qalligaq takkuara, ullaaralaaq uugarpassuarnik aalisarfigisartagarput, qaqqat isigaakka, qilaap killingusaani uukkarussimasutut ittut. Pingasoriarlunga assiliivunga, inuit orneqqippagut, ajoqi naggataarutaasumik oqaluussileruttortoq. Taqqissimaap qatanngutaa najaalu kiserngorupput. Qatanngutaata utaqqisarfik pattalaarpaa, najaalu kiserngoruppoq.

Aak
Igaffiup naqqa aagasaartuinnaavoq. Hansi tallimanik puisissimavoq, taakkualu pilanneqaleruttorput. Arnaatigisaa Polunikka, ulloq naallugu pisiniarfimmi ningiutut sulisimavoq, maannalu unnuup tungaanut, nalunaaquttap akunnerani arlalinni suliassaqalerpoq: Puisit ameerneqassapput, amiilu kinillugit, taamaalioreeraanni puisi pilanneqassaaq, puussianullu neqaa immiunneqassalluni. Uulliat arlallit igamut qalattumut issorarneqarput, uanitsunik naatsiianillu akullugit. Hansip saviit ipissarpai, uangalu saftiliorpunga.

Mamakkaaju!
Puisip neqaa orserlugu. Frikadiilit rødkål-ilerlugit. Nannup neqaa, flæskestegi, qilalukkap neqaa hakkebøffillu qillertuusat.
Qaleralik, medisterit, aalisagaq, kotelettit, suluppaagaq qeqqussallu soya-mut misullattaallugit. Ammassaat, tinguliaq, kapisilik, spegepølse aappalaartoq, eqaluit, spaghetti Napoli, oquuttat, puulukit pamiui, kanajoq, remoulade, qeeraq pølsillu appalaartut. Mattak, kukkukuuaqqat, aqisit, sukkulaatit manniusaliat, taateraat, bearnaisimik miseqqiaq, qeerlutooq boorlullu kariallit. Nerleq, majonæse, imeqqutaalaq, ribbenstegi, uillut, millionbøfit siuteqqullu.
Mamakkaaju!

Imeq
“Eerdaniaad, imerdardiliddi eqquilerpua. Angerlarniarit imertarlutillu erruilerama.” Jamesikkunni Olsen-eruttulersugut Sabina sianerpoq.
Silap ississusaa minus 20-imiippoq, imertartarfillu userartuaffigisarsimanermik, majuartarfii quatsersimavai. Imeqarfik liiterinik tuusindilippasuarnik nillertumik imaqarpoq, aasakkut Tiniteqilaap avannaatungaaniit tatsiniit immerneqartarpoq, ukioq kaajallallugu qerinaveersimatinneqartarpoq. Toortagaq tooraanni ingerlaannaq imeq kuulersarpoa. Ukiukkut imertarneq ajornanngeqaaq, dunkit aputikkut kalittariaannaasaramik – aasakkut nammaatilerluta imertartarpugut. Ilaanneeriarlutik meeqqat ilaat, imertaatitta qavanut ingiteriarlutik uniaqqusarput. “Tsukkakkaajummi! Sukkasuumik!”
Apuukkama Sabnap imertaamma simia naamaniarpaa:
“Angiaarneranngitsikud eerdakkalivarpiid? Anaqanngitsutigut ingerlakkaluarpiuk?” aperaanga.

Uffarneq
“Puuh, dipararraalid!”Tipeqaatit!” Sabine oqarpoq. Uffarnissara nakerisorsuusanngilara. Erngup quliutillu ipeq orsukulullu peertarpai, naak taakkua issimut illersutaagaluartut. “Illu sullivimmi” kuutsitsivigaluni uffartoqarsinnaavoq. 10kronimik akeqarpoq, sivisunerpaamillu akunnerup affaa uffartoqarsinnaalluni. Sabinap ermiunni isuatigut kryds-ilerlugu nalunaaqutsersimavaa, allat atussanngimmassuk. Paarlakaajaalluta tunugut asappagut. „Ilivami upparniaad. Iluamik uffarniarit,“ Sabina oqarpoq. Ini uffarfik aallerpoq, tarrarsuut aallerpoq, tassanngaannarlu matukkut kasuttortoqarpoq:
Tsivitserpaddaaligajeraaq. Sivitsorpallaaleqaaq.” Otto illu sullivimmi nakkutilliisuuvoq.

Unaana kina?
Ikinngutiga Asser qimmerissorsuuvoq. Apuutiaarpugut. Akuttunngitsunik kanajorniartarpugut, Jamesi ningaavalu David peqatigalutigit.Ilaanneeriarluta orsuminermik neqitalertarpugut. Kanajoqaqaaq, puussiallu ulikkaartut angerlaattarpagut. James-ip puisinut qassutai aamma aqqusaartarpagut. Ilaanneeriarluta immitsinnut qanittuararsuulluta qimussimik ingerlaartarpugut, immitsinnut sammerujuujutigaluta.
Jamesip tikkuariarlunga oqarpoq: “Una kiaana.” “Unaana kina?”
Puisinik qinertuarpugut.Takugaangattalu, qimmigut sissamut qanillattuuttarpagut, taava Asser Jamesiluunniit qaqortunik atisisisarput, taaluttatut atugassaminik. Taamaalioreeraangamik puisi pallittortarpaat. Puisilu niaqqeraangat, piniartoq unigasuartarpoq, puisip sumik isumajunnaarnissaata tungaanut, niaqqeqajunnaaraangallu aallarfigeqqittarpaa. Piniartup puisi qalligaangamiuk, pallortarpoq aallaariarnissaminullu inissilluni, puisip niaqqernissaa utaqqilersarlugu. Ulloq taanna Jamesi puisippoq, Kuugaarmiit sikuani.

Qallunaat nunaat-Kalaallit nunaat uterlugulu
Danmark-iliarpunga.
Sabine Danmark-iliarpoq.
Sabine Kalaallit nunaaliarpoq.
Uanga Kalaallit nunaaliarpunga.

Ikerasak tininnermini imaaruttartoq
Igalaakkut talerpiatungaanut itsuaraangama, sissami puttaat arriitsumik qaffagiartortut isigisarpakka. Inussatut isikkoqarlutik qalleraatiinnarlutik, ukiup sikua qimakkiartuaartarpaat.
Timmisartumut ilaasut tunumiuinnangajaapput. Timminitsinni nipaarluusimapput, nunartilli qalliartuleramikku oqallisilerput, sumullu tamaanga tikkuartortarlutik. Kulusumiit Tasiilamut qulimiguulimmut ilaallunga ingerlaqqippunga, tassanilu Sabina naapissallugu. Taava qaqqat qulaavaallugit, qooqqutigoorluta Sermiliup kangerluatigut, naasuikkaanik sikorsualik ingerlaffigaarput. Qeqertaq Sarpaq nallerparput, ikerlu Tiniteqilaap kangerluini marloqiusanngorlugu avissaartitsisoq, tikillutigu. Ikerasammi umiatsiaq takusinnaavarput. Nalaani angutit marluk ingerlaput. Tassa Hansi Augulu. Ikkarluit akulloqquallugit umiatsiaaraq ingerlapaat. Piniariassallutik aallalerput, piffissaq kingulleq atorsimagunarpaat, ikermi imarnersaarutilereersimavoq. Sabinap angerlarsimaffini takuleramiuk kiinaa nuannaajallappasippoq. Tiniteqilaaq: Ikerasak, tininnermi imaaruttartoq.

Inuit 158-it
Pisiniarfik, aningaaserivik, kommunellu allaffia.
Atuarfik, oqaluffik, katersortarfillu.
Talittarfik, imeqarfik, innaallagissiorfillu.
Inuit 158-it.

Tallimanngorneq unnuppoq, katersortarfimmi nuannapput
“Aaqqappid aappaa igivaddanniaa taginngilaalingid! Aaqqappit illua ikiuallanniaruk, takunngilaatigut!” Augup aaqqammi illua saqqummerpaa, benziinamik kuerarpaa, Hansimullu isaallugu, taassumap naaligaq ilulissap qaavanut kappussimavaa. Tassunga aaqqat iteqqisippaa, innerlu tagiarlugu. Nalaa qaammarpoq. Tunumi Sermiliup kangerliumarngata qinnguani,Tiniteqilaaq ippoq. Nunaqarfiup qaqqaata kitaa tungaani, angut utoqqaq illumi silataani, tarrup ataani nikorfavoq. Aallaanni kivippaa. Igerpallaap kangerluk akisuatippaa. Illumiit qanitaaniittumiit, nipilersuutip tumerparpaarpalunnera tusarsaavoq. Tassanngaaniit qulleq ikeqattaarpoq.

Tallimanngorneq unnuppoq, katersortarfimmi nuannapput.

Piniartutoqaq appakaappoq. Qulleq ikeqattaartoq kiinaanut qasoqqasumut qaammartitsivoq. Kiinaa atugartorpasippoq. Katersortarfiup qeqqatigut, kigaatsumik aalajangersimarpasissumillu ingerlalluni, tumerparpaartoq Vittus toraarlugu ornippaa, kalerrissallugu, qatanngutaa Sermiliup ikerani sikorsuarnut mattussaalluni ingerlaqinneq ajulersoq. Vittup tumerparpaarutini ilivai, angutillu marluk peqatigalugit, qaammartartulerlutik tarrup ataani Hansi Augo Jaco-lu ujassallugit aallarlutik.
Ullaaq Ilertaajiup nalaani suluppaagarniarpugut, kingornalu Paarnakajiip tungaanut Hansip puisinut qassutai takuniarlutigit. Piniariartarfitoqarli tikinngilarput. Sarfaq sakkortoqaaq, sikulu sukkaqaluni aqqutissatsinnut assiukiartuaarpoq, Tiniteqilaamut ingerlaqqinnissarput ajornarsisillugu.. Aqqutissatsinnik iluatsitsiniartilluta ingerlariaqqiffissaaruttarpugut. Umiatsiamiit nioriarluta, umiatsiaq ajattartaraluarparput, neriulluta aqqut tamanna iluatsitsiffigissallutigu. Puttaat ilaat mikipput ilaallu navianarlutik, tuaviinnarlu tullianut ingerlaniapallattarpugut, nakkartinnata immatsinnatalu. Sermiliup ikerata nalaa putsup ulissimavaa. Taaq takkutilerpoq. Aquuteralak aallarumajunnaartoq aallartinniarsaritillugu, sumiissuserput tammaasimavarput. Hansip pujorsiunni tiguaa, vhf-ikkullu Tiniteqilaami piniartut attaviginiarsarilerlugit.. Sikorsuit kiggiguteqattaarlutik nipiliornerat tassanngaannaq vhf-ikkut qallerneqartutut ippoq: “Hansi tusaavakkid, Hansi tusaavakkid.” Nunaqarfimmi angutit utoqqaat ilaasa oqariartuuterput tusaasimavaa. Augu marloriarluni igippoq. Patruunip nipaanneq qaqqanut kangerlunnullu akisuatitsivigaa. Angutip utoqqaap iginnigut, akillugit ataasiarluni igippoq, inuilaarsuarmi uagutsinnut annguppoq. Kinguninngua motoori unippoq. Nipaqarata umiatsiaami issiavugut, tarrup ataani. Taamaalinerani Tiniteqilaami angut utoqqaq katersortarfimmut ingerlavoq, tumerparpaartorlu piniartoq Vittus, Hansip qatanngutaa ujarlugu.
Augup aaqqatai nungullutik ikumareersullu, ungasissumi nipi tusaalerparput. Motoorip sikorsuit akulloqquallugit ingerlarpalunnera. Qaammartartut seqersimaneri kangerluup imartaanut, sikorsuarnullu akulikeqisunut seqersinneqaqattaarpoq. Suaartarneri akisarpagut. Siunitsinniippullu sikorsuit isorartoqisut, nunap tungaanut assiussimasut. Tarrup ataani patruunit pingasut immiuppakka. Maanna aallersitta umiatsiamiit niullutik pisullutik ornilersimavaatigut. Toorutip tooriarpallattarnera, piniartup nakkarnissaminut illersuutigisaa qalliartortoq tusarsaavoq. Piniartup aapparaa Hansip qatangutaa Vittus. Oqaaseqarata iliuuseqalerpugut: Vittusip allunaasaq silittoq nassarsimavaa, taanna umiatsiamut puttaat illuatungaaniittumut pitunneqarsimavoq. Aquuteralaap, angutillu arfinillit assororneri iluaqutsiulugit, Hansip umiatsiaa imarnersamut appakaatitipparput. Tassanngaanniit Vittukkut ingerlavigisimasaat, Tiniteqilaamut atuarlugu ingerlavugut.
Sissiukkami Sabine anaananilu utaqqipput. Suluppaakkat pisarisimasakka puussiamiittut tiguai. Siunitsinni Hansi Augolu tamarmik puisitaminnik uniarlutik ingerlapput. Nipaapput. Unippunga ikerullu tungaanut isigalunga. Nunamiit isigalugu ikeq nillerpaseqisoq, qiianarpaseqalunilu taartuinnaavoq, ersinarluni; toornaarsivimmut assersuunnarluni – taamaakkaluartorli kajuminnarluni. Tassanngaaniit aggerpugut? Taakani ilungersuatilluta misigisaq allaanerunngila? Sapiissuseq, piniartup eqissisimanerani ippoq. Nipaallutik paasinninneranni. “Tsuid? Suit?” Sabine aperivoq. “Addiivardili? Aliortorpit?” Illariarujussuarpoq. “Ilaaniaad, qilikkiatsaluud! Qaaniarit, qitikkiassaagut!”

Talimanngorneq unnuppoq, katersortarfimmi nuannapput.

Qitik
Tagitsavatsi, aalisardini qiliddeq. Takussavarsi, qitillunilu aalisartoq!” Aalisartoq Mathias naqqup qeqqani qittaserpoq. Aalariaasai assigiinngitsitaarput, aalisarnermi periutsit ilaat, aalaasaani ilisarnarput. Mathias aalisagarpassuarnik pisaqartarpoq. Aalisarfiit ilisimaarai, aalisakkat ingerlaarfii, eqquilluarlunilu aalisarfissaminik putuliortarpoq.
Taamaannermisuulli katersortarfiup naqqani qitinnissani sungiusimatigaa, meeqqat utoqqaallu kisiisa qiteqatigineq ajorpai. Arnat inuutsaruttortut avalattarpai, nipilersuutip sukkatsikkiartuaarlunilu nutarpasinnerulernera ilutigalugu.

Fritidsklubbi
2-2 2-3 3-3 4-3 5-3. Nerrivimmi arsaararneq ingerlarsorpoq. Ajugaasoq ingerlaqqittarpoq, unammisassallu arlaliusarput.
Allat billard-ertarput nerrivimmiluunniit arsartunik unammisarlutik.
Unnukkut inuusuttuusugut fritidsklubbimi katerittarpugut. Tassani kioskinnguaqarpoq, mamakujunnik sukkulaatinik, qaleralinnik eqalunnilluunnit, kiilumut 40kroonilerlugit pisiarineqarsinnaasunik nioqquteqartartumik.
Fritidsklubbimi eqeersimaarneqaqaaq. Peqiimigaanni kisianniuna nullukkut meqquteeqqamik kapitilluni, matugaangallu malersuunneq attortaannerulluni apummi ingerlaqqittarpoq.

Supermario
Inuarakasik trekantikkut pisseqattaarpoq, arsamullu ingerlaqqikkaangami nakkarnaveersaartarluni. Sabinap supermario pinnguaatigaa.

Sabinap ajugaanera
Sabinap, nunaqarfimmi nerrivimmi arsaararluni, unammersuarnerit ajugaaffigai
Unamminera fritidsklubbimut takuniarsimavara. Kiinaa aappalaartuinnaalluni unamminini ilungersuutigaa. Takunngilaanga, tulluusimaarluni angerlarpoq, oqatigalugulu ajugaasimanini, aperaangalu sooq ornigussimannginnersunga.

Puisip tingua ooqanngitsoq, suli kissartoq
”Aanangaa!! Aajuna!!” isussuppunga. Qeqertannguup qanitaani, puisi puisimavoq. Kinguninngua aqqarpoq. Kigaatsunnguamik aqqarfiata nalaa ornipparput. Utaqqivugut. ”Aanangaa!” Hansip puisi pueqqimmat takuaa. Ummiuppara. ”Aaddaniaa!! Nugeerniaad! Aallaaniaruk!! Tuaviorniarit!” Kingusinaarpunga. Puisi aqqarpoq, nueqqiganilu.
Hansiuna eqqumeeriartartoq. Qanersoriani ammuppaa erinnanillu tulleriinngitsunik appilluni, qitiutigaluni, qiiaarserluni. Puisip niperujoorut tusalersimallugu puivoq. Qinerpoq, ingerlaannarlu aqqaqqilluni. Hansi ugguaammerpoq, tunoqeriarlunilu quilerluni. Taamaalisorlu puisi puivoq. Hansi siggarfigaara, aallaanni tiguaa ummiullugulu, aallaariarpoq, eqqorpaalu.
Erniinnaq ooqanngitsumik, suli kissartumik tinguttussaagut.

Piffissaq
Hansilu qimussimik Sarpaliarpugut. Assut apisimammat, qummukajaakkuuleratta qummut pisuppunga. Tamaani arlaanni unippugut, qamutinilu kaffisulerluta.
Tassani akunneq ataaseq issiavugut.

Piteraq
“Muluaddaatsanngaalid pilarngalerpoq. Muluallaassanngilasi – piteralerpoq,” aalisartoq Mathias aarlerisaarivoq.Sikiimiffigaara, apisimaqisukullu arrissunagu ingerlalerlunga. Puisinut qassutit kilumiiterialunni ungasitsigisumi ipput. Avatangiisera nipaalluinnarpoq, seqinnerluni, piterarnissaalu ilimanarani.
Puisinut qassutit Kuuugaarmiit eqqaaniittut tikikkakkit pissangavunga. Erniinnannguaq puisissimanerat paasissavara, allunaasaq qassutiniit qisummut atasoq nusukarukku. Ernerlunga malugaara. Allunaasap nusukarnerani oqimaalleqqittarpoq: puisi angigunaqaaq. Toorutiga tiguara, sikulu amutsivigisassara putoorluarlugu, puisi amuniassagakku. Massiimisarpunga qinerlungalu. Suli takusassaqarnanilu malugisassaqanngilaq. Puisi amugakku, qilerutseriarlugu uniarlugu aallaruppara, qassutit aappai, qanitaani ittut takuniarlugit. Pisaqarsimanngillat, qassutitaali sikumut qerrugussimapput, iluarsissagaanni sivisuumik suliarisariaqarlutik. Nalunaaquttap akuneri ingerlapput, suli qerrugussimapput, tarrajussilersimavoq, qaammalli nuilerunnarsivoq, qaamanerulissaarlu. Suliara tiguartisimaffiginermik, takkuitsoorsimavakka qaqqat qaavi persilersimasut.
Piteraq qalliartorpoq.
Anorsaap kavaajara teqqalatilermagu , massiimivunga, sikullu qaava persilersimasoq paasivara. Tuaviorlunga qassutit qimappakka, puisi uniarlugu angerlamut aallarpunga. Kingusinaarlungali. Peteqqap qulangereersimavaanga. Anori sakkortoqisoq tassanngaannaq takkuttarpoq, nilleq apullu kiinnannut torarput. Sumiiffeeruppunga, aqqutit tamarmik ersigunnaarsimapput. Toora tigullugu aqqutissara qajannarnersoq toortarpara. Tamanna sarfaqarfiummat, nalunartarpoq siku sumi qajannarsisimanersoq. Taamatut angerlamut ingerlavunga, piteqqap ataani, nunaqarfiup tungaanut aqqutaa eqqukannerunarlugu.
Tassanngaannaq siuninni iluliarujussuaq erserpoq. Ajorlunilu ajunngilaq; ajunngilaq, iluliaq taanna ilisarigakku, qaammatit tallimat matuma siornatigut tamaanga qerrugussimavoq, ajorporli, nalunnginnakku ilulissap qanitaa tamanna sarfartuujusoq, ilulissallu qanitaa qajannarsinnaasoq. Tooriarama, ingerlaannaq siku putuvoq. Aqqutigisara tamarmi assigiiaaginnaavoq – ilami ingerlavigereersimasara allaat qajannarsisimavoq! Pallorpunga, puisitaralu sikukkut kingumut kaamisalerlugu, oqimaassusera assigiisinniarlugu,, paarngorlunga siku qajannaatsoq uterfiginiarlugu. Tarrup anorersuullu ataani Tiniteqilaaq anguvara.
Sabinap arnaata bingoriarsimalluni angerlarami, puisi pilappaa.

Aalisartoq Mathias
Piterareersimagaangat siku ulorianarsisarpoq, sikup taarnersai mianersorfigisariaqarput, imarnersaasinnaammata. Ilaanni Mathias sikukkut taamaattukkut nakkarsimavoq, qaqeqqinerlu ajulerluni. Minutsialunni taamatut akersuutereerluni, tassanngaannaq tummagaqartutut issimavoq “Tsoordu Nunakkaatsiaq. Soorlu ujarak,” sikumullu qaqivoq. Guutip ikiorsimavaa, piniartut ilaat oqarpoq.

Ernineq
“Utaqqilaarit, assiliisoq assiliisilaariarlugu.” Sabinap qatanngutaa Karen ernisuppoq. Naalungiarsuup niaqua puttuppoq, juumup assiliinissanut periarfissippaanga.
Niaqua, puallaarissoq silarsuarmut appakaattoq isigaara. Niviarsiaraagunarpoq. Uninngaqqissaarpoq, sequnngingalluni. „Daa! Qaa!“ Sabinap soraluartaani takulluarumallugu utaqqikatappoq. Karen singuvoq, meeqqallu timaa tamarmi anillakaappoq. Iluna inuuvoq.

3 x Otto
Arnatoqqap, nukappiarannguaq ataataminik taagorpaa.
Niviarsiaraq nukappiaqqatut atilik.
Angutit pingasut ateeriit
3 x Otto.
Inuk toqugaangat, inunngortup aterisarpaa.

Qitik
Sabine Nikoline Andersine Nina Ebba Maqi liibersimavoq, kimmikkaalerluni, toornilimmillu kjolilerluni. Qatanngutaata meerartaaqqaata kuisissammat. “Peqqeraava? Kusanarpunga?” Sabine aperivoq. Kjoleni qullarpaa, trussit ulloriaasallit, kamaasiallu amunillit saqqummerput. “Iorunaraalid. Inequnaqaatit,” akivara, qiteqatigilerlugulu.
Sabina katersortarfimmi qitittoq takusarpara, uangalu avalakkumavallaassananga. Maannali angaata illuani kisimiileratta, Sabina qiteqatigilerpara. Nerriviit, issiaviit, madresserlu qarsuttaarlugit qitippugut. Sakortusiartuinnarluta. Igalaakkut ikersisimasukkut, oqaluffiup siarnga sianerpaluttoq tusarsaavoq, Sabinali uteriiserpoq “Aamma, aamma, qilinnermud ilinniardiiatsiikkid. Aamma, aamma, qitinnermut ilinniarteriarlakkit.”

Oqaluffik
Asser sianertuuvoq. Aalisartoq Mathias ingilluartitaarpoq. Hansi oqaluussilluni aallartippoq. Inissisimanera eqqissisimavoq, imminullu tatigerpasilluni – soorlu piniariarsimagaangatta taamak pissuseqartartoq. Oqaluussinera kitaamiusoorpoq, immannguaannarlu paasisaqarpunga. Oqaluffiup iigaani, ulluinnarmi atuarfiutigisartumi, assit qalipaateqanngitsut Prins Henriup Dronning Margrethellu assingi sinilersimasut nivingapput. Ukiualuit matuma siorna, Tiniteqilaamut tikeraarsimaput, puisimik pilattumik isiginnaariarlutik aallaqqissimapput.
Tussiut siulleq. Arnat utoqqasaat pingasut ersarissumik sajukulasumillu tussiarput, Boas angummanniarluni pattappoq. Silami Augu aalisaatilerluni sanioqquttoq takuara. Hansi qiviarpara. Aallutani pimoorulugu ilumoorsaarpoq, Asser aniatitsiluni sianerpat, ajoqi angerlapallatussaavoq, ajoqitut atisani peeriarlugit, kaffiliussaaq, marluullutalu Ilertaajimmut aallassaagut, aalisartut allat ornillugit.

Sulupaagaq
“Aappalaardoq! Aappalaartoq!” Augo suaarpoq, takusinnaagamiuk aalisaatiga pisaqartoq. Nylon aaqqatinniit sisuulerpoq. “Peerdunngud! Peerlugu!”
Alutornartaqaaq; Sermiliup kangerluani, puttaap qaani, suluppaakkanik itinermiit aalisarfikkut amooraluni.Qisuminermut nylon 600 miiteri immussimavara. Nylon-ip naanerani qarsorsat tallimat qillaalapput, taakkununnga neqitassat ikkussuuttarpaka. Qarsorsat itinermi 300-500 miiterimiileraangata, nylon-i qisuminermut qajannaarlugu kappussimasannut qilertarpara, aalisarfiga kaajallallugu nylon-i ulamertunngorlugu inissittarlugu. Suluppaagaq kiigaangat, qisumineq aalassattarpoq, taava nylon-i tigoriarlugu pingasut-sisamariarlunga nusukartarpara, ilumut aalisagaq kiisimanersoq qulakkeerniarlugu. Qaqippara, suluppaagaanngilaq, qeeranguna. Augup naaligaq qeeqqap qarnganut qallivaa. Qeeqqap naaligaq kiivaa. Qeeraq aammi qeqqani pikippoq.

Piniartoq angerlaraangat
Ulloq naallugu Sermiliup kangerliumarngani, umiatsiaaqqat siassimapput. Tiniteqilaarmiut umiatsiaaraat arfineq pingasut piniariarsimapput. Maanna imminnut kateripput, aqqut kingulleq Tiniteqilaap tungaanut kinguleriiaallutik ingerlaqatigiissamarlutik. Angutit piniariarsimallutik angerlamut saapput. Puisit pisarisimasaat umiatsiaminnut iteqqisissimasaat kisippakka: Katillutik 14-iupput.

Puisip neqaa nutaaq
Aasiit piteraq.
Illu qeqititsivittullusooq qiianartigimmat, inimi kissarsuutip saavani sinippugut. Ullaaq kangerlummut aalisariarsimavunga. Angerlarlunga naapippara Sabina, angummik oqqassisorujussuaq. Akissarsiffiuvoq. Sabinap kamaatigaa, putumasut meeqqisarlutik angalaarnerat. Angullu akisimavoq Sabina nammineq ajornartorsiuteqartoq, angutaataa kuisimanngimmat. Kingorna angut angerlarsimaffianut ornippara, oqarfigalugulu, qatsulluinnarlugu, Sabinamut uannullu akornusersuiinnarmat. Kamalerpoq, najugaqataasa najummivaat. Kingorna Hansikkuliarpunga, iserfigaakka angutit pingasut nallukattaqatigigai. Pisimasoq kamaatigisara oqaluttuaraara. Hansip eqqissilluni isigeriarlunga aperaanga, angut taanna aalakoornersoq. Angerama“Ii. Aap,” qinnuigaanga igaffimmiittoq neqi qalaqqaaq nereqqullugu.

Unnuaq
Unnuaq igerpallammik tusaavunga. Ullaarlu qulimiguulik ullaaruteqaluni takkuppaluppoq. Angut inuusuttoq imminut aallaasimavoq.

Sinik
Sinittuarpunga, sinissaqaqaanga. Immaqaana naqitsiniisaffik. Immaqaluunniit sumiiffik. Illuni allani inuusuttut allat aamma sinngupput. Itertarpugut, suli uernarluta.

Erinnat asanninnilersaarutit
„Nugeerniaad, maleq parnaarniaa! Tuaviorniarit, matu parnaarniaruk!” Sabina oqarpoq. Angut putumasoq iserniarsarivoq, matulu kasuttorlugu. Sabinap igalaat saaguerpai, anaanami angutaatikua apummi makinniarsarisoq takuaa. “Anaanarnga daddaniinngilaq. Anaanaga tamaaniinngilaq,” Sabina oqarpoq, igalaallu saagullugit.
Sanilitsinni nipilersorpaluk, igalaani ammasuniit tusarsaavoq. Kalaallisut erinarsuutit taakkuinnaat, asanninnilersaarutit, maqaasinilersaarutit. Arlaat qiavoq, alla nilliavoq. Sabina uangalu alaatsinaappugut.

Vittup illua
Sabinalu nuunnikuuvugut.
Vittup illua attartornikuuarput, inuttaata Tasiilamut suliartornerani. Illu katersortarfiup tunuatungaanippoq, Sermiliup kangerluanut isikkiveqarluni. Illu anginngilaq, marlunnik mikisunik initalik, 25 kvadratmiiterinik angissusilinnik. Illut allat assigalugit, illu piterartarneraniit aqqusaarneqartarsimaqaaq. Igalaat saapput, iigai quppaqartiterput, kissarsuulli oliatortoq ajunngilaq, taassumap ajornartorsiuteqarnani illu kiatsissinnaavaa.
Puisissimavunga, Sabinallu nerisakugut puisit neqimerngi igalaakkut igippai, nutaamik neqitorniassagatta. Igalaat ataanni uitsappaluttoqarpoq; qimuttut pilernguppalupput, nukittuneq pissarsissaaq ilani eqqarsaatiginnguarnagit. Vittup inaa asserpassuarnik nivinngaaffigineqarsimavoq, ilaquttat ikinngutillu assingi, Nalaasaarfiup qulaani iikkami sapannganik sanaaq angisooq, piniartoq aallaasilik arnarlu kalaallisoortoq nivingapput. Sapanngiat qulaanni, quppaq qilaami iikkamilu ippoq, tamanna nipinneqqummik qernertumik nipitiffigisimagaluarparput. Nerriviup qaani naneruutit marluk ikumapput, fjernsyni Qanoroorpoq – Nutaarsiassat kalaallisut – inip aappaani sinittarfimmi, kissarsuutikkut kassitortukkut puisip neqiliorpugut. Kissarsuutip eqqaaniippoq qerititsivik angisooq, qaleralinnik, suluppaakkanik, eqalunnik, ammassannik puisillu neqaanik qannittoq, iikkamut madressit saattut marluk napparlugit taligussimapput, innaleraangatta natermut siaartakkagut.
Illup isaariaani puisip amia qattamut aappalaartumut kinitaq ippoq, saamia tungaani aallaasiga napavoq, qisumininnguarlu nylon-imik 600 miiterimik takissusilimmik imutsivigineqarsimasoq, qarsorsallu – suluppaagarniutit. Sisoraatikka, amermik perlaalikkat, illup qaaniipput, qimmit nerissanngimmatigit. Kamippattaasa pinii illumi panerserput, kamippattai, Sabinap asaammut siaarsimasumut ilisimavai, kamippami Buffalo-nik taaguutilit, aasaq Ishøj-ip Bilkaani pisiat eqqaannut. Paarlerni saattumik saagoqarpoq, taqqamani ineerannguaq ippoq, qattaq anartarfik tassaniilluni. Ininnguaq igalaavaraqarpoq, igalasserfimmi naneruut ikumatipparput.

Godmorgen
Iterama Sermiliup kangerluata tungaanut itsuarpunga. Nipaaqaaq. Sabina sinippoq, qaammalerneralu isiginnaarpara. Nittaassimavoq, nunaqarfikkut aperlaakkut ingerlavunga, aalisariarlunga. Ullut ilaanni siulliusimariaraangama, nunaqarfiup aalisartortai ataasiukkaarlutik illuminniit anillattaasut isiginnaartarpakka, kangerluup tungaanut ingerlasut aalisariarlutik. „Kumorn,“ oqartarpugut, kinguninngualu aalisagartarput putumiit amuulersarlugu. Allamik oqarnissaq pisariaqartanngilaq.

Kussak
Qortsugaji. Kussak,“ Sabina taamak taaneqartarpoq. Miiterimik ataatsimik affarmillu angissusilik, nujai tukattut. Aalisagartakka puussiaq ilivakka, errortoriarlunga qupanuup eqqaanut madressimut innarpunga. Isimi illua uisiimivaa „Eeqqimi kiivaa! Aarimmi kiivoq!” nillerpunga, sequnngeqqipallappoq naammagittaalliuummerlunilu. Arlaleriarlunga taamak oqarpunga, kiisa aapparma qipimmik ulippaanga.

Kissarserneq
Qiterligut imminnut tigulluartitaarsimapput. Nutsuppagut, aappaata iperarnissaata tungaanut. Hansip saaniminermik oqummersersimavaanga, ulussannut tinupatitsivoq. Taava nissugut imminnut paarlatsipagut, talitsigut tigulluta, assorornissarpullu tamaat noqqulerluta. Kingumut orloqqaartoq, ajugaasarpoq. Pinnguarnerput parrinnermik naggaserparput, taava piniariarsinnaalerpugut.

Amitsivardiva
“Ov, ov!” Hansip qimmini unitsippai. Uangalumi malugaara – siku ingerlavipput qajannarpoq. Hansip iperaattami tigummivianik siku anaalerlugu misiligarpaa, nammassinnaaneraatigut pasiniarlugu. Sermip tasianut ingerlavugut, eqalliarluta. Umiatsiaami qimmit tallimat nassataralugit, unnuaq Tiniteqilaamiit Amitsivardivata kangerluata sikuanut ingerlasimavugut. Sermiliup kangerliumarnga sikuersimariaraangat, akunneq ataaseq ingerlavigisariaqalersarpoq. Ullumili akunnernik tallimanik ingerlavugut. Siku qajannaatsoq tikikkatsigu, umiatsiamillu ingerlavigineq ajornarsimmat, sikukkut qimusserluta ingerlaqqippugut.
Siunitsinni Amitsivardivap kangerlua, takisooq amitsorlu, nipaaqaluni kajungernarlunilu ippoq. Hansi qamutiniit nioqattaarpoq, naalikkamillu siku toortartarlugu. Uangalu aamma taamaaliullattaavunga.

Qanga Hansi sikukkut taamak ittukkut, qimussimik nakkarnikuusimavoq. Sikup ataa sarfarsimaqaaq, nakkarfianit sarfap taartuinnarmut ingerlatilersimagaluarpaa. Immami nilleqisumi itsilluni toqunissi qulariunnaarsimagaluarpaa. Aatsaallu panini eqqaaleramiuk, nukini tamaasa atorlugit, nakkarfimminut uteqqissimavoq. Sikumut qaqeqqinniaraluarsimavoq, ajornarmalli taamaatiinnarsimavaa, allunaasamut nermusimasimagami, taannalu qimminut ipereersimasunut atalluni. Taamaaleruttornerani illooraa Louis qimussimik takkussimavoq. Louis qitimigut allunaasamik qilersimavoq, sikumut pallorluni oqimaassutsi inissiluariarlugu, sikumut saaqisukkut pallungalluni ingerlalersimavoq, Hansip tungaanut. Hansip nakkarsimaffia miiterialunnguanik ungasitsigileramiuk, allunaasaq savillu Hansimut miloriussimavai, taamaalilluni Hansip qimminut qilersimanini kipisimavaa sikumullu qaqinneqarluni. Maanna tassa Hansip paffiini tamanna takussutissaqarpoq, allunaasaq paffiinut sukarussimasimammat.

Sikukkut ingerlallualereerlutalu imarnersaq takulerparput, allatut ajornartumik nunamut ingerlasariaqalerluta, uujarteraluta qaqqap ataatigut nuna sinerlutigu.
Qaqqap sinaa ingerlavissarput kussangavoq, kussangajaakkut pisuttariaqarpugut, imaq atitsinniittoq nakkarfigiumanagu qamutit assororluta sangusimatinniartariaqarpagut. Siku qajannaatsoq takusinnaaleratsigu, qaarngukkoorluta aqqarfigaarput. Ilungersuajunnaarlutalu anersaartorlualerpugut, kiagorulukkunnaarpugut. Sialuk kuisuinnaavoq.
Nunami qisumernit takussaapput. Qanga manna inoqarsimavoq. Kangerliumaneq nerutunngilaq, illuatungeriinnik qaqqanik unguneqarsimavoq. Nerukilliartuinnartutut misinnarput, ilummut pulajartortilluta, tappavani qaqqat akornisa allat, aqqutigineqarnissartik utaqqisutut ippaat.
Qanorliinna tamanna kangerluk ateqarpa? Amitsivardiva…

Puussiaq qaqortoq
Puussiaq qaqortoq Hansimut eqqunneqarpoq. Puussiaq puisip neqaanik nutaamik imaqarpoq. Ullut ilaanni Hansi taamatut pajunnissaminut tulinnguuttarpoq. Puussiat qaqortut puisip neqaanik, aalisakkanik, qeqqussanik, uillunilluunniit imallit.

Nanerduvagai!
Nanerduvagai! Nanorsuaq!” Ullaakkut nalunaaqutaq arfininngorpoq. Illutsinniit ungasigani nanoq puisimik pilaffikumi sinnikusiorpoq. Piniartut umiatsiaminnut ikiorareersimapput. Nanoq qimaavoq, unngasilleqqinngilarli.

Hakkebøffit
Hansip arnaataa Polunikka Danmarkimiippoq. Hansilu puussiaq ulikkaarlugu neqinik assigiinngitsunik pisiniarsimavugut. Maanna frikadiililiorpugut, hakkebøffit, ribenstegi, medisterpølsit kottelittillu, kajortumik miseqqerlugit rødkål-ilerlugit, naatsiialerlugillu.

Sikumi pinnguarneq
Sissami, puttaamiit puttaamut pisseqattaarpugut. Malersuisoq ornigutsinnagu puttaamut allamut pissipallattariaqarpoq. Sukkatsikkiartuinnarpugut. Thomas isippoq, maanna pingasuinnanngorpugut.

Eqaluit 101-it
Nugeerniaad! Tuaviorniarit!” James suaartarpoq. Sikumi imatsinninnguami eqaluttagut iliorarsimavagut. Qimmeq pitussaq pituussaarsimavoq, pisagullu nerinialerlugit. Ullut kingulliit siallersimagami, aput qituliorsimavoq, maagaliornaramilu ingerlavigalugu kigaannarluni.

Angutit arfiniliuvugut. James Salo-lu. Marius Augu-lu. Gert uangalu. Gertimuna qimmia pituussaarsimasoq. Eqalunniit peersippara, Geertilu anertikkaqaluni tikiuppoq qimmini pitukkiartorlugu..
Johan Petersen-ip kangerluaniippugut. Qinnguata tasiisa kussernisalu nalaanni, Neerernartivap qaqqaata qanitaani. Ukiup qaammataani issileruttorfinni tatsip sikui issusuumik sikusimasarput, sikup putuniarnera ilaanni nalunaaquttap akunnerata affaanik sivisussuseqartarpoq. Iluatsitsinngikkaanni misileeqqittariaqarpoq allami, ilaannimi sikup naqqatalu akorni tasertaqarneq ajorput, allamilu misiliisariaqartarluni. Ilaanneeriarluta 10-20 centemiitiinnarmik itissusilimmut oqummersaq ningittarparput, tamannalu eqalungaatsiarsuarmik pisaqarfigisinnaasarlutigu. Maannali upernalernerani siku issusoorsuunngilaq, 5-10 minutsiinaat atorlugit putuniagassaasarluni.
Jamesi uterfigiganni, eqalungaatsiareersimavoq, quppami amuneqarfimmik eqqaani, eqaluttai aalaalupput. “Tsukkanngeraalid. Sukkanngeqaatit,” James oqarpoq.
Ualip ilaa, Jamesi ujarassuup tunuanut kivileriarluni aquippoq. “Jaamisi kisiina? James, suinuna?“ suaarpara. Qalliartulerlugulu. Jamesi ujaqqanik tigusivoq, majorteqeriarlunilu malersulerlunga. Illarnermik arlaleriarlunga taseqqatigut pangallattarpunga. Jamesip anguaanga, patittalaariarlungalu, eqqannut ingippoq, qasuerserluni. “Tsukkaraava? Sukkavunga?” aperivoq. “Ii, Jaamisi tsukkakkaajorujutsuaq. Aap, Jamesi sukkasoorujussuuvoq,” akivara.
Ulluni taakkunani marlunni qinnguata tasiini aalisarnitsinni, sialuk kuuttuarsimavoq. Siku Johan Petersen-ip kangerluaniittoq saannerulersimavoq. Angerlamut saakkatta, umiatsiagut sikup sinaanut pitussimasut ornitsillutigit, arlaleriarluta qimmigut unissartarpagut, arlarpullu siuartittarparput, taassumap tuuminik siku qajannarnersoq misilittaqqaartarpaa, immannersanitsitilersimavoq, sumilu tamaani siku ammaannartunik putoorsimaluni. Umiatsiagut tikikkatsigit, siallerunnaarpoq, seqineq qaqqap nuuaniit nuilluni seqersutut ilivoq. Nalunaaqutaq sisamanngorpoq ullaakkut. James-ip umiatsiaata naqqanut innarpunga, sininniassallunga. Puttaat ilulissallu akulloqquallugit Tiniteqilaap tungaanut aallarpoq. Takusinnaavara assaasa pillagunartut, aquut tigummigaat. Qanoq iliallakkaangami qiviartarpaanga illalaarlunilu.”Ilanngaalaarniaad, tsinnadderdarniatsaulid”. Siniinnarit, sinnattussaqassaqaatit.”

Qimuserneq kingulleq
Angiivilluta sialuup ataani qimussitta eqqaani qeqarpugut. Angutit sisamat arnarlu ataaseq. Asser-ip puussiaaqqat pingasut saqqummerpai, agguarpagullu. Tiniteqilaap tungaanut aqqutaa imaannaanngilaq, useqaqigatta. Asser uangalu peqatigiippugut. Qalerallit 70-80-it, qamutinut qaleriit sisamanngorlugit usiliussimasagut. Oqimaassusai hunderuju kiilut arlaqaalussapput. Qummukajaakkut Imiilaamiit Kuugaarmiit aqqulaat, ingerlavigissagaanni, tamassumap aallaqqaataa sivingasorujussuuvoq, taamaattumik Asser uangalu qamutit tunuinni pisuppugut, qimmillu uniagaannik oqilisaallugit. Arlaleriarluta apummut marrittarpugut, taamaaligaangatta Salup, taanna kisimiilluni qimusserami, ikioriartortarpaatigut. Siunitsinni Gert Julialu ingerlapput, aanngareersimapulli. Gertip qimmii sukkaqigamik nukittoqalutillu.
Ippassaammat kangerluk Qernertivartivit qanitaaniittoq tikipparput, nunaqarfiusimasoq, tamaani Tasiilap pigisaarmiut aalisarrattarput, qalerallit tamaaniittut ikkattumi immata 200-300-miiterinik itissusilimmi. Tikinnerput iluatsitsivallaanngilaq: Piniartut marluk Kuummiuneersut ningittakkatik sikumut siaarsimavaat – qarsorsat qaleralittallit avungarsuaq siassimapput, taamaariarmata Assap qimmiisa naasimallugit tungaannut pangalluserfigaat. Qimmigut unitsissinnaanngilagut, aqqut sivisooq atoreelugu nererusulersimapput. Qarsorsat arlallit qimminik oqummiunneqarput, taakualu Asser-ip piiartariaqarpai. Aalisartut Kuummiuninngaanneersut ammassannik nutaanik nassataqarput, taakkualu neqitaraagut. Aatsaat qaleraleqataavunga, periuseq, suluppaagarniarnerup assigimmagu, erininarsinngitsoq eqqarput qaleralinnik aalaaluppoq. Aalisagaqangaarmat, akunnerni 20-ini tassanitilluta unikaallanngilagut. Piffissaq tamaat amorfigaarput. Aalisariarfitsinniit utimut aallaratta kingumut qiviarpunga. Kangerluk isigisara avungarsuaq manippoq, piffimmili aalajangersimasumi putut aqqanillit putoorneqarsimapput. Putuukkat taakkua eqqaat aalisakkat aavinik erlaviinillu qernaaluppoq, qimussit ingerlavikui tumillu nalunaarpaat, qimussit takkuttarlutillu ingerlaqqittarsimasut. Saanikut qalerallit uunneqarsimasut qaavinut kuineqarsimapput, qisuminerlu aamma tassaniippoq – aalisarnerup iluaqutaasa ilaat - napisoorsimasaq, putullu eqqaanut qimaannarneqarsimasoq. Maanna aalisarfigisimasaq akersuuffiusimasutut isikkoqarpoq. Maanna pisagut angerlaappagut.
Unnuaq taanna Tiniteqilaami sialuk kuuginnaavippoq. Sabinap makilluni atisakka masattut piiarikka ikiorpaanga, kissarsuutillu qulaanut nivinngaassorpai panersissammata. Kuserneri kissarsuutip qaanut torarput. Nipaalluinnaraangat kusernerat aatsaat tusaaneqarsinnaavoq. Kusernerisa nipaat, kissarsuummi tammikalallutik nungugiartuaarpaluttarput. Sabinap angaani, angajuanilu najugaqarallaratta nipi tamanna aamma naalaartarpara, maannali nammineq illunni nipaannerup ataani naalaarpara. Pisakka qissimippakka, puussianut akimut ersittunut issorarsimasakka, paarlerniipput. Qimusserneralu kingulliuvoq.

Sikuerpoq
Ukioq qaangiuppoq. Talittarfimmi umiatsiat angisuut, qaqortut, sukkasuuliat initallillu, sanileriiaallutik umiatsiaaqqat aalisariutit nalaanni talinngapput. Sikuersimavoq, upernaallu ullui siulliit nunaqarfinnit qanitanit Kuummiuniit, Sermiligaamiit, Kulusumiit, illoqarfimmiillu Tasiilamiit tikeraarfigineqarput. Tassanngaannaq ilisarisimanngisanik Tiniteqilaaq innuppoq. James-ikkunnut, Jamesip qatanngutaa nulia meeraalu Sermiligaamiit tikeraarput. Maanna inuit 15-it illuanni najugaqarput. Olsen-ertugut, angutit marluk Kulusummiut pulaarlutik iserput. Kulaa qaddunaaq! Godda`qallunaaq!” Aappaa oqarpoq “Kulaa kalaaleq! Godda` kalaaleq!“ akivunga. ”Diilerilaarmeeq. Tiniteqilaarmioq,“ Jamesi oqarpoq. „Aah, kulaa diilerilaarmeeq!“ angut naqqippoq-„Kulaa Kulusumeeq,“ akivara.
Angutip aappaata, nallukattanik aalateriutigaluni aperaanga: „Tamaani tsuid?Maani sulerivit?“. Uangalu tuikka qullaamivakka.

Naler-nguudaanneq
Sabinap ajugaasimaarluni tallini qullarpai. Ajugaaqqippoq. „Naler-nguuddaanneq“ pinnguaatigaarput. Sabine, Susanne uangalu. Nunamut itersanngualioriarluta, oorit tassunga miloriuttarpagut. Qallinerusup oorit tamaasa tigooqqariarlugit , ataatsikkut qummut miloriuttarpai. Oorit kronimut tuttut, pinnattaassaasarput, sinnerilu tullinnguuttup tigusarpai , taamatullu silaannarmut miloriullugit. Aasap unnuini „naler-nguuddaanneq” Tiniteqilaami pinnguaatigisaqaarput. Ullumikkut qattuninnguami Nuummi, Sermiliup kangerluaniittumi, Tiniteqilaap avannaatungaaniittumi pinnguaat taanna pinnguaatigaarput.
Hansi, Polunikka, paniallu Susanne, Sabinalu piniariaqatigaagut. Pinnguartilluta, Hansip puisi takuaa. Umiatsiaamut pissipallappugut, malersulerlugulu. Sivisuumik aqqaamasarpoq, qattunerulli qaavani Polunikka Sabinalu ilulissap tunuatungaanut tikkuartorput. Iluliaq kaajallakkatsigu, puisi saqqummerpoq. Hansip aallaavaa, nuunnguamut uteqqippugut, nutaamik puisiliussalluta. Qaammat juniuvoq, taarsissananilu. Sabinalu unnuamut, sinngup puutsinni toqqip silataani innangavugut, puisinilli takkuttoqaqqinngilaq.
„Qaneq eqqartsaalerarpid?“ Sabine aperivoq: „Suna eqqarsaatigaajuk?“ Aalajangersimavunga sapaatit akunneri marluk qaangiuppata Danmarkiliarniarlunga. Nangaajuarpungali.
Ullaakkut Hansimik itersarneqarpugut. Tuaviorluta Tiniteqilaamut ingerlasariaqarpugut. Danmarki Englandimut arsamik unammingajalermat, unamminerlu toqqaannartussaavoq!

Nipaanneq
Qeqertami Tasiilaajiup eqqaani Hansi puisimik pilappoq. Ajoraluartumik amerluppoq, amialu tunineqarsinnaanani. Meqqui katalersimagamik. Aasakkut taamaaligajuttarput, puisit sivisuallaamik seqinnisaartarmata – mamaardeq. Hansip ugguarnera malunnanngilaq. Nutaartugassaqalerami nuannaarpoq, uangalu inalugai imaarpakka, taakkua mamarisaraakka. Tingua aapasoq nerivarput, neqaalu uummammik aqajaruanillu akullugit uullutigit. Qaarsillajaarpugut, Sermiliup kangerluanut saalluta ingilluartitaarpugut.
Tiniteqilaamiileqqaarnera eqqaamavara, taamani tunup aasaanera suli misiginikuunagu. Hansip aasakkut piniariartarnitik eqqartorpai, nipeqarani, ulloq unnuarlu qaamasarnera, kuuit kuuppalunneri kisimik tusarsaasartut. Aalakoortoqarnanilu, kamaattoqarfiunngitsoq. Eqqissineq kisimi, soorunami aamma eqaluppassuit.
Sermiliup kangerluanut ilorparterpugut. Innaarsuit ataatigut ingerlavugut. Innaarsunni naajat taateraallu mannimminnik ivapput. Hansi pilerisaarpara manniliaqatigiumallugu. Qorsooqqinnersatigut, ullut qalliartorpagut. Sinerparterlunga, mannik ataaseq ulluniittoq takusinnaavara. Ingippugut. Taamatut issiallattaartarpugut, nipaannerup ataani.

Poortugaq qernertoq
Ulloq naallugu poortuivunga, Sabinap karsit poortornerini ikiorpaanga, nipittartulersorlugit. Qimalernissarput eqqarsaatiginaveersaarparput. Sivikitsuinnarmilli. Nunaqarfikkut ingerlaneq uannut artornarpoq, siooqqatigigakku inuit takoqqinnginnissaat, amerlanersaammi ikinngutigilersimavakka.
Unnuaq kingulleq Hansikkut qaliaanni sinippugut, suna tamarmi ukiut marluk matuma siornagut aallartissimavoq. Aalisariutikka suluppaagarniutit, poortorsimavakka, Hansilu qinnuigalugu qaliaminnut ililaaqqullugit. Isumaqataavoq;“uddud ardaanni uleqqitsangalivarngima. Ulummi arlaanni uteqqissagaluaruma.“
Hansi Augo-lu peqatigalugit suluppaagarpassuit pisarisarsimavakka.“Aappalaardoq! Aappalaartoq!“ Augo suaartarpoq, kinguninngua suluppaagaq isai anillaruloorsimallutik eqqaaniilersarpoq.
„Qaanniaa! Qaaguk!“ Hansi oqarpoq. Poortugaq qernertoq isaappara, qaliaminnut toqqugassaa.

Piffik
Tiniteqilaamiit aallaratta, takuara Jamesi illuminniit anisoq, nammattagalisarluni naaligalisarlunilu. Piniarialersoq. Sequnngerpunga, takorloorlugulu eqqaani pisullunga. Sabinap innakarfigaanga. Anori nilleqisoq kiinnatsinnut torarpoq. Silagissuup ataani Ikaasagtivap kangerlua ingerlaffigaarput, qaqqanik portusuunik unguneqarsimavoq, qaangiavagut qimussimik qassusiarfigisarsimasakka, uillunilluunniit katersiartortarfigisimasakka.
Sikorsuit akulikilligaluttuinnalermata, kiisa naggataagut ingerlariaqqissinnaajunnaarpugut. Immaqa Tiniteqilaamut uteqqiinnarutta ajunnginnerussaaq.Nunamut qaqqap ataanut niuvugut, aqqutaata sinnera qanoq isikkoqarnersoq paasiniarlugu. Aqqutissaarpasinngilaq.Avungarsuaq isikkivik sikorsuarnik matusimavoq. Hansilli aqqutigisinnaagunakkani aalajangiussimavaa, puttaallu anginerit akornutaasut ajattarlutigit ingerlaqqilerpugut. Nalunaaquttat akunnialuini akersuutereerluta taamaatiinnarpugut. Aalajangerpugut aalisakkiorallarniarluta. Sabinap atsaa, Tasiilami najugalik, puussiarsuarmut qaleralinnik eqalunnillu nassaappara.
Ilagut nallukattalerput, uangalu qeqertap taliffigisimasatta illuatungaanut pisuttuarlunga aallarpunga. Sivisuumik kisima issiavunga. Nipaaqaaq. Nipaassuseq Kalaallit nunaanniinnaq misigisassaasoq. Sivisuumik issiasimagama, Sabinap nuiffigaanga. „Tsuid? Ninngappid? Suit? Kamappit?” Imartanissimanngilaq, utiinnartariaqarpugullu.
Tiniteqilaami suli ulloq ataaseq.
Unnukkut Hansikkut pulaartoqarput. Illartarlutillu oqaluttuaqattaapput. Sabinap illariaasaa aalajangersimasoq tusaalluarniarsaraara. Peqataasinnaanngilangali. Qaliani kisimiippunga, qiallungalu. Kingusinnerusukkut Sabine majuarpoq. Tuppallersarpaanga, nakuussusia tupigusuutigara. Kinguninngua qialerpoq, innangavugut immitsinnullu isigaluta. Sivisuumik taamatut innangavugut oqaaseqarata. Piffimmi sivikitsumi, ukiut marluk affaatalu matuma siornatigut pereersimasut, puigortutut ippakka.
Sabine kisiat nakkuppara.

Ukiut marluk tunumiissimaneq
Aqaguani Kulusuup mittarfiani ippugut. Sabine mamakujussivoq, sodavandi sukkulaallu. Hansi oqariasaarpoq Tiniteqilaamut utertariaqalerlutik. ”Qangar-li, ulaqqilaaqqaartinnavuud? Tassa, utaqqilaaqqaarsinnaanngilagut?” Sabine aperivoq.
Nipeqarata umiatsiat talittarfiannut aterpugut. Attallaakka tungujortut peerpaka, Hansimullu tunniullugit. Alinnikuuput, aalisakkallu nigguinik ipertullutik. Ukiut marluk tunumiissimaneq.
Siullermik Polunikka inuulluaqquara, kingorna Hansi. Hansip isiginera pisarnermisut inngilaq. Maanna Sabine kiserngorupoq. Siullermik pisarnitsitut kunittaaserput, naggammik iliuuseraarput, soorlu unnuit tamaasa kunittarnitsitut: Siullermik Sabinap sigguga qulleq kunippaa, taava alleq, kiilaarlugu oqarfigalungalu “Ngivakajingina, ngivanngivagajiiluuliina”. Taava uanga Sabinap siggua qulleq kunippara, taava alleq, kiilaarlugu oqarfigalugulu “”Ngivakkajingina, ngivanngivagajiiluuliina.” Isaasigut isigiinnarpara, kiisinerma iperariartornera ilutigalugu. Sabinap tunuppaanga, umiatsiamullu ikiartorluni, issiavianut palluumilluni inissippoq. Tassani pallungaannarpoq isigalungalu, Hansip maskiina kingumorsortillugu aallartippaa. “Ingerlalluarina!” Hansi suaarpoq. Polunikkap Sabine ikiorlugu massitippaa. Maanna aallarput. Sabine aalaterivoq.